مافوشي آئلينڊ: قدرت جو خوبصورت ماڳ

اسان جي ٻيڙي آهستي آهستي ڪناري سان لڳڻ لڳي ۽ اسان به هڪٻئي پٺيان هڪ هڪ ڪري سڀ هيٺ لهي آياسين. جنيد ۽ نظير ٻيڙي واري کي پئسا ڏيئي، اهي به هيٺ لهي آيا. نظير سوڊاني پنهنجي فيملي سان گڏ پنهنجي منهن سان گهمڻ لاءِ روانو ٿي ويو ۽ اسان وري پنهنجي منهن سان. هرڪو پسي پرين کي. سو لهڻ سان ئي مافوشي Maafushi لفظ جيڪو وڏن اکرن سان لکيل هيو، ان اسان جي آجيان ڪري پاڻ ڏانهن گهرايو. هي ڪافو اٽول جو هڪڙو ٻيٽ آهي. هي ٻيٽ مالي کان 26.8 ڪلوميٽرن جي مفاصلي تي آهي. اسان سڀ ان لفظ جي موهه ۾ موهجي وياسين ۽ انهن اکرن کي ساڳيو ئي پيار ۽ سنڌي ثقافت وارو مان ڏيندي انهن جي پٺيان بيهي، تصويرون ڪڍرائي، اکرن کي مان بخشيو. لفظ مافوشي جي معنيٰ آهي وڏو ٻيٽ "Big Island". ڇو ڊيهيوي Dhivehi مالديوي ٻوليءَ ۾ لفظ “ما "Maa"” جي معنيٰ وڏو "big" آهي ۽ “فوشي” "Fushi" جي معنيٰ ٻيٽ "island"آهي. سو ان حساب سان ان جو مطلب ٿيو “وڏو ٻيٽ”.

هر خطي جي مٽيءَ جي پنهنجي خوشبوءَ هوندي آهي، هن سامونڊي ٻيٽ واري مٽيءَ/وارِي جي پنهنجي منفرد ۽ نرالي خوشبو محسوس ٿي. ناريلن جي ڊگهن وڻن، سمونڊي جي فيروزي رنگ جي صاف شفاف پاڻي جي خوشبو به ڪنهن دلربا محبوب جي بدن جي خوشبو کان گهٽ نه لڳو. جيئن ئي ٿوري دير لاءِ اتي بيهي چوڏس نظر ڦيرايم ته هر طرف ناريلن جا ڊگها وڻ، نظر آيا. پاسن کان وڏيون وڏيون عمارتون، فليٽن جا اپارٽمينٽ جن مان ڪن جو ڪم هلي رهيو هو ته ڪي مڪمل ٿي چڪا هيا.وڏا ڪشادا روڊ، روڊ جي وچ تي ۽ پاسن کان ٻوٽا، کجين جا، ناريلن جا ۽ گلن جا ننڍڙا ٻوٽا ماحول کي کنيو بيٺا هيا. پريمي جوڙن ۽ پريمڪائن جي هن ديس کي ”پيار وارن جو ديس“ چئجي ته به منهنجي خيال ۾ ڪو وڌاءُ نه ٿيندو. وشال سمونڊ جي جهولي، ڪيڏي نه صاف سٿري ۽ موهيندڙ آهي. سمونڊ جي ڪنارن سان ٽڪرندڙ ڇولين جو آواز، شور، گوڙ اهو ٻڌائي ٿو ڄڻ ته ڪن ٻن دلين جو ٽڪراءُ ٿيندي ميلاپ ٿيندو هجي. سمونڊ جي دل ڪيڏي وسيع آهي. پاسي ۾ نوٽيس بورڊ تي ڇوڪرين لاءِ خاص هدايتون لکيل هيون. جنهن ۾ ٻين هدايتن سان گڏ هيءُ به لکيل هو ته بڪني ۽ برا پائي هلڻ بيچ تي سخت منع آهي. پر مردن کي اجازت هئي ته اهي ڀلي چڍا پائي گهمندا وتن. انهن کي ڪو به نه ٿو چئي سگهي. ان نوٽيس بورڊ کي غور سان ئي پڙهي رهيو هيس ته اسان جي سامهون هڪڙي ٻيڙي اچي ڪناري تي لٿي، جنهن مان ڪيترائي گورا لٿا. انهن مان هڪڙي چائني ڇوڪري به لٿي، ان کي بڪني پاتل هئي، شايد هن جي نظر ان بورڊ تي پئجي ويئي هجي، ان ڪري هن هڪدم لهڻ شرط ئي اتي سرعام ٽارائوز ڪڍي پاتو. منهنجي خيال ۾ اهڙن جاين تي ڪپڙن مٽائڻ جي لاءِ، ننڍڙا ننڍرا ڪمرا هجن. ته جيئن پبلڪ مان ڪو به ماڻهو چينج ڪرڻ چاهي ته هو ان ۾ وڃي، عوامي نظر کان اوجهل ٿي، ڪپڙا مٽائي وٺي.

اسان اتان اڳتي نڪري سامهون کان مختلف دڪانن جو ديدار ڪندا اڳتي وڌياسين ته نظير هڪ دفعو ٻيهر اسان سان ٽڪرائجي ويو. هو به گهمي پيو، اسان به. هن چيو ته،”واپسي ۾ گڏ هلنداسين، ساڳي ئي فيري ۾“. اسان هن سان سهمت ٿياسين.

نظير سان ۽ هن جي فيملي سان ڪجهه تصويرون نڪتيون پوءِ هر ڪو پنهنجي منهن سان وري. پاڻ گهمندا گهمندا، دڪانن جو جائزو وٺندا هلندا رهياسين. اسان جي واپسي 4 وڳي هئي. ان ساڳي ئي ڪناري تي جتي ٻيڙي اسان کي لاٿو هو. صبح واري نڪري ويل ٻيڙي اتي ئي اچي لڳندي. سو گهمندا گهمندا پاڻ هڪڙي عمارت جي هيٺان لنگهاسين ۽ پرتاب ان ۾ اندر هليو ويو. ڪائونٽر واري کان هوٽل جي ڪمرن جا اگهه پڇي آيو. هن ٻڌايو ته،”هوٽل ۾ ڪو به روم خالي نه آهي. سڄي دنيا جا سياح خاص ڪري آسٽريليا، اسپين، آمريڪا، چائني، سعودي عرب جا ماڻهو لٿل آهن. هوٽلن ۾ وڏي رش آهي. هر هوٽل جو ڪرايو في بيڊ روم جو 185 ڊالر هيو، ٻي جو 70 کان 80 يا 100 ڊالر آهي. جيڪو اسان جي حساب کان تمام گهڻو مهانگو هو. هن علائقي ۾ گهٽ کان گهٽ هوٽل 35 کان 40 ڊالرن تائين هئي. سو به سنگل بيڊ“. اسان جي رهائش گريدو ۾ اٿينس وويو ۾ 25 ڊالرن ۾ هئي، جيڪا ٽرپل شيرنگ آهي. اهو ڪريڊٽ جنيد ڏي وڃي پيو ته هن گهٽ ۾ گهٽ، سستي ۽ معياري هوٽل بڪ ڪرائي هئي. سوڊاني ڊاڪٽر نظير به اسان واري ٻيٽ ۾ ئي رهائش پذير هيو. هن ٻڌايو ته هن جي رهائش جنهن هوٽل ۾ آهي، ان جو ڪرايو 22 ڊالر آهي. جيئن ته نظير ڏهن ڏينهن لاءِ آيل هيو ۽ اسان فقط چار ڏينهن هياسين. ان ڪري هن سان رعايت ڪئي ويئي هئي. اتي ئي هڪڙو ٻيو اسپين جو جوڙو مليو. نوجوان ڇوڪرو ۽ حسين جميل ڇوڪري. ڇوڪري ڏاڍي خوش هئي. هن جي خوشي هن جي چهري مان ليئا پائيندي نظر آئي. هن سان ڪچهري دوران انهن ٻڌايو ته اهي هر ٻيٽ ۾ چار ڏينهن گذاريندا. گهٽ ۾ گهٽ مهينو کن رهندا. مان سمجهان ٿو ته انهن جي صحت ۽ وڏي عمر جو راز به اهو آهي ته اهي دنيا جي جهنجهٽن کي خدا حافظ چئي، مالديپ ايندا ئي ان ڪري آهن ته اهي سک جو ساهه کڻن.

Index

Sindh Digital Readers

Search This Blog

Advertise With Us – Grow Your Brand Today!

مافوشي آئلينڊ: قدرت جو خوبصورت ماڳ

Digital Sindh, Smart People

Comments

Post a Comment

WhatsApp

You May Like

You May Like

Labels

Archive