جيلي فش - ھائڊرا - فائيلم پليٽي ھيلمنٿس

ھائڊرا (Hydra)

ھائڊرا ھڪ تازي پاڻيءَ جو سيلينٽريٽ آھي. جيڪو خوردبيني سان چٽيءَ طرح ڏسي سگھبو آھي. ھن جو جسم ھڪ سلينڊر وانگر آھي سندس ھڪ ڇيڙي جي آخر ۾ ھڪ سوراخ آھي جيڪو وات (Mouth)  سڏبو آھي ۽ اھو ڪيترن ئي ڌاڳي نما بناوتن ٽينٽيڪلس سان ويڙھيل ھوندو آھي. ٽينٽيڪلس ۽ ٻاھرين تَھَ تي ڪيترائي زھريلا ڏنگيندڙ جيوگھرڙ ا(Stinging Cells) ٿين ٿا. جن سان ھو پنھنجي حفاظت ۽ شڪار ڪري ٿو. ھن جو وات ھڪ پوري خال يا سيلينٽران (Coelenteron)  ۾ کلي ٿو ۽ اھو جسم جي اندر ٿئي ٿو جتي شڪار کي ھضم ڪري ٿو. ھائڊرا جي جسم جو آخري حصو عام طرح پاڻيءَ ۾ ڪنھن جسم سان چنبڙيل ھوندو آھي.

جيلي فش

جيلي فش سمنڊ ۾ رھي ٿي ھيءَ پاڻيءَ ۾ آزادي سان ترندڙ سيلينٽريٽ آھي. جيلي فش جو وات ڇٽيءَ واري پاسي جي ھيٺان وچ ۾ ٿئي ٿو ۽ اھو چئن ڊگھين ٻانھن سان وڪوڙيل ھوندو آھي ۽ ھر ھڪ ٻانھن ۾ ڪيترائي ڏنگيندڙ جيوگھرڙا ھوندا اٿس. ھي پنھنجون ڊگھيون ٻانھون ننڍڙن جانورن کي پڪڙڻ ۾ ڪم آڻي ٿي.

فائيلم پليٽي ھيلمنٿس (Platy helminthes)

پليٽي ھيلمنٿس کي عام طور فليٽ ورم (Flatworm) چئبو آھي. ڇو ته سندن جسم سڌو سنئون تراکڙو (Flat) ھوندو آھي. ۽ اھو گھڻو ڪري جانورن سان گڏو گڏ انسانن ۾ رھڻ وارو تراکڙو يا ويڪرو مفت خور (Parasite) آھي. انھن مان ڪي آزاد رھڻ وارا آھن جھڙڪ پلينيريا اھي تازي پاڻيءَ ۾ رھندڙ آھن. پليٽي ھيلمنٿس ٽن تهن وارا يا ٽرپلو بلاسٽڪ (Triploblastic) جانور آھن ٻاھريون تَھَ (Ectoderm)، اندريون تَھَ (Endoderm) ۽ وچيون تَھَ ميزوڊرم (Mesoderm) آھي.

Back to Index