Back Page Title by Malook Lund

اسين حال هيڻا ، اوهان جي خدائي-وڏي ڳالهه آهي!

هلي پئي اڃان زندگيءَ جي لڙائي-وڏي ڳالهه آهي!

انڌيرن ۾ پلجي پئي روشنائي-وڏي ڳالهه آهي!

اڃان وقت پئي ڳولي سچائي -وڏي ڳالهه آهي!

شيخ اياز

           

                                                       

بلوچ صحبت علي 01.01.1974ع ۾ دادو شهر جي  محلي ڇاڻو شاهه آباد ۾ هڪ غريب هاري محمد يعقوب لُنڊ جي گهر ۾ جنم ورتو. ان وقت ڪنهن جي خواب و خيال ۾ به ڪونه هو ته هن پُٺتي پيل علائقي ۾ جنم وٺندڙ هي نومولود ٻار اڳتي هلي پنهنجي پيشي، علم، ادب، اختلاقيات ۽ ثقافت ۾ ايترو نالو ڪمائيندو.

پيشي جي لحاظ  کان پاڻ هڪ ڪامياب وڪيل آهي. سندس تعليم  ايل ايل.بي، بي.ايس سي، ۽ ايل ايل. ايم آهي. پاڻ ٿوري عرصي ۾ پنهنجي پيشي ۾ ايڏي ته مهارت  حاصال ڪيائون جو هينئر دادوءُ جي وڪيلن ۾ تارن ۾ چنڊ مثل پيو جرڪي. پاڻ تقريبا سب ڪيس ميرٽ جي بنياد تي کٽيا اٿن. اها ته آهي سندن پيشي ۾ ڪاميابي، پر ادب جي ميدان ۾ به جڏهن سن 1995 ۾ قدم رکيائون ته علمي ۽ ادبي ميدان جو اهو جاکوڙي شهسوار بنجي پيو، جنهن جو هينئڙو اوٺيءَ وڳ جيئن هڪ جاءِ تي ٿانيڪو نه پيو ٿئي. پاڻ مختلف طرفن کان ووڙ ۽ واڪا ڪندو روشني ڦهلائڻ لاءِ جهرجهنگ، واهڻ واهڻ  ۽ نگر نگر ڦرندو رهي ٿو. سندس هن وقت تائين ڪل سترنهن 17 ڪتاب ڇپجي چڪا آهن، جيڪي مختلف موضوعن تي لکيل آهن .

بلوچ صاحب هڪ سچو ۽ پنهنجي ڌرتي وطن سان  مڪمل طور تي ڪميٽيڊ اديب/شاعر آهي. شعري مجموعا ”ڀاڱا ڀاڱا ڀونءِ“ ۽ ”من صحرا صحرا“ ، شاهڪار ڪتاب آهن. ان کان علاوه سندس نثر ۾ لکيل ڪتاب، ”سوجهرن جا سفير“ ، جيڪ مختلف سنڌ جي مختلف اديبن ۽ شاعرن کان ورتل انٽرويوز جو ڪتاب آهي ، سو پڻ هڪ لازوال تاريخي دستاويز آهي.

پاڻ همه گير صلاحيتن جو مالڪ هجڻ سان گڏ ادب، سماج، سياست، تاريخ ، سماجي سائنس ۽ جدلياتي علمن جو پڻ گهرو ادراڪ رکي ٿو.

بلوچ  صاحب پنهنجي تحريرن ۾،  ٻولي ٺيٺ سنڌي، نهايت سوَلي ۽ سلوڻي استعمال ڪرڻ جو ڏانءَ رکي ٿو، جنهنڪري هڪ اعليٰ تعليم يافته فرد کان وٺي هڪ گهٽ پڙهيو شخص به ان کي سمجهي ۽ حظ حاصل ڪري سگهي ٿو.

بلوچ صحبت نثر نويس، شاعر، مترجم ۽ نقاد آهي.  ترجمو ڪرڻ به هڪ خاص فن آهي. ڪنهن ڌاري ٻوليءَ جو ترجمو پنهنجي ٻولي ۾ يا ڪنهن ٻي ٻوليءَ ۾ ڪرڻ تمام ڏکيو ڪم آهي. ڇو ته هر ٻوليءِ جو گرامر يعني محاوره، اصطلاح ۽ نحوي بناوتون پنهنجي خاص نوعيت جون هونديون آهي. انهن جي اصطلاحي جملن جي معنيٰ جي گهرائين جا نمونا ۽ نزاڪتون به پنهنجي خاص نموني جون هونديون آهن. تنهنڪري ترجمو نهايت خبرداري، محنت ۽ احتياط سان ڪرڻو پوندو آهي. ته جيئن اصلي ٻوليءَ جو روح مجروح نه ٿئي ۽ سندس مفهوم ۾به  تِر جيترو فرق به نه اچي. بلوچ صحبت انهن لوازمات کان بخوبي واقف آهي. تنهنڪري ترجمي ڪرڻ وقت اُهي هڙئي گهرجون پوريون ڪندو آهي.

ملوڪ لُنڊ

09.01.2019