اخبارون پڙهڻ مان فائدا

نين ڳالهين کي ڄاڻڻ ۽ دنيا جي حالتن کان باخبر رهڻ انسان جي فطرت رهي آهي. قديم دور جا ماڻهو دنيا جي حالتن کي ڄاڻڻ لاءِ سير ۽ سياحت ڪندا هئا، ڇو ته سير ۽ سياحت ڪرڻ سان به معلومات ٿئي ٿي. دنيا جڏهن وڌندي ويجهندي وئي ته اخبار آئي. ماڻهن ڄاڻ وڌائڻ لاءِ اخبارون پڙهڻ شروع ڪيون.

سائنس ۽ ٽيڪنالاجي جي تيز رفتاري، دنيا جا وڌندڙ مسئلا ۽ معاملا، دنيا جي پاڻ ۾ ڇڪتاڻ، نون وسيلن جي ڄاڻ ۽ انساني تعلقات جي ضرورت اڄ سڄي دنيا کي هڪ ڪري ڇڏيو آهي. انهن ۾ اخبارن ۽ ٽي وي جو اهم ڪردار آهي. هاڻي ريڊيو جو دور پراڻو نظر اچي ٿو. اخبارن ۽ ٽيليويزن کان علاوه ڊش انٽينا ۽ سيٽلائٽ، انٽرنيٽ اهڙو ته ڪم ڪري ڇڏيو آهي جو سڄي دنيا جي معلومات منٽن ۾ ملي وڃي ٿي ۽ ان کان سواءِ فون ۽ موبائيل فون ته دنيا کي مٺ ۾ ڪري ڇڏيو آهي.

انهن شين هوندي به اخبار کي وڏي اهميت حاصل آهي. ٽي وي وغيره جا پروگرام اسان ٻڌي ۽ ڏسي سگهون ٿا پر اخبار اهڙي چيز آهي جا بار بار اسان پڙهي سگهون ٿا.

هي اهڙو دور آهي جو اخبارن ۾ نه رڳو خبرون هونديون آهن بلڪ سياسي، معاشرتي، اقتصادي، مذهبي ۽ تعليمي مسئلا ۽ معاملا هوندا آهن ۽ انهن تي تبصرا پڻ هوندا آهن.

اخبارن ۾ هر طرح جا اشتهار هوندا آهن جيئن روزگار، شادي، ڪاروبار، ڏيتي ليتي وغيره. ان ڪري اخبارون پڙهڻ مان وڏا فائدا آهن.